|
Lunari 2006
IL BÙTUL
Un atri an al è già pasât,
rivât cumò al è già lât
cence une polse par tirâ flât
cence rispièt pa nestre etât.
Il timp al côr, no l'à riguârd,
di lui nus reste nome il ricuârd.
A pàndi dute la veretât,
al nestri vìvi si è adeguât.
Simpri di corse, mai fermàsi,
nancje il timp di saludàsi.
Uè si fâs dut in premùre
e da int 'a no si à pui cùre,
vòi nome pa l'orlòi
e 'i sin simpri pui besòi.
Si è smenteàde la ligrìe
di un bon rìdi in companìe,
di une taule cui amîs,
da la sagre dal paîs,
di un schers fat vie pa gnot,
di contasi un strambolòt,
di fâ insieme un bièl bal
fintramai c'al cjante il gjal.
Ai miei timps tante misèrie,
fan une vore e stràdes di glèrie,
al dîs il nono al so nevôt
e al dì di uè nissun no 'i crôt,
ma par il ben da comunitât
ogni tuàrt al ere smenteât.
Quant c'a l'ere di fâ fièste,
chei di sinistre cun chei di dèstre.
Al sarès biel torna indaûr
e lu dîs cun dut il cûr,
par tornâ a jòdi tai nestris paîs
ciàmpe e drète duc' amîs
scjaldâ di gnûf la nestre plàce
fûr l'unviêr e disfâ la glàce,
cun tun'anime sclete e sincère
spetâ insieme la primevère.
Ma tirìnsi dongje e cjalìn par ben
che bièle gjème su chel len,
c'a mi vegni un colp sa no è vère:
fin ìar l'atri 'a no ère!
Dute colpe da creùre,
di dut chel frêt, 'i soi sigùre.
Ma quant il timp al è madûr
vèle pronte a saltâ fûr
cu la sperànce di deventâ
une gnove vite di samenâ.
'A è apene nassùde ma 'a larâ lontàn
al è il prim bùtul da PRO COSEÀN.
Ines di Tole
|